أخت جوزي بقلم عادل عبد الله

أخت جوزي
بقلم عادل عبد الله

انا أمرأة متجوزة من أربع سنين وبحب جوزي وجوزي بيحبني جدا
اتجوزت في بيت عيلته و اهله كانوا كويسين معايا ، ورغم ان حماتي متسلطة الا اني كنت بحاول ارضيها علشان جوزي .
اما حمايا فرجل كبير في السن ومش بيتدخل في اي حاجة وبيقضي وقته بين زياراته لبعض الاقارب واحيانا بيقعد علي القهوة .
اما اخت جوزي الصغيرة دلوعة العائلة ومفيش حد بيقدر يزعلها لأن حماتي وحمايا بيحبوها قوي وبيسمعوا كلامها ويصدقوها في كل حاجة .
البنت اتخطبت من حوالي شهرين وكنت عارفة ان خطيبها بييجي يزورها مرة كل اسبوع يوم اجازته .
وكنت في يوم زيارته لها بقلل من طلوعي عندهم .
وفي زيارته كان جوزي بيطلع عند حماتي و يسلم علي العريس ويسيبه قاعد مع خطيبته وهو يقعد مع حماتي وحمايا لحد ما يخلص زيارته ويمشي .
لكن احيانا كان جوزي بيجيله تليفون فينزل قبل نزول خطيب اخته .
والصدفة خلتني اكتر من مرة اشوف اخت جوزي بتنزل ورا خطيبها ويقفوا علي السلم بطريقة مش مظبوطة وكنت بشوفهم من ورا الباب .
نبهتها اكتر من مرة ان كده غلط وانها بالشكل ده بترخص نفسها وان خطيبها لو لقاها سهلة كده هيتسلي بيها شوية ويسيبها .
لكن هي حاولت تقنعني ان مفيش حاجة بتحصل مفيش اكتر من ماسكة ايد وكلمة رومانسية و بس .
ولما اتكرر الموضوع ده اكتر من مرة والبنت مسمعتش كلامي ، حاولت انبه حماتي وقولتلها لازم تخلي بالها شوية من بنتها وخطيبها لكن رد فعلها كان غريب !! قالتلي انا بنتي متربية احسن تربية وعمرها ما تعمل الغلط ابدا وخطيبها شاب محترم .
كنت عايزة اقولها علي اللي شوفته لكن حسيت اني لو قولتلها مش هتصدقني وممكن تسود عيشتي وتقول لجوزي خصوصا ان جوزي عصبي جدا وبيصدق امه في اي حاجة ، قررت اسكت .

وفي يوم بعد الضهر كنت طالعة عند حماتي علشان ادوقها من الحلويات اللي عملتها ولما طلعت لحماتي كان باب الشقة موارب ، دخلت عادي ومفيش حاجة في دماغي ببص شوفت اخت جوزي هي وخطيبها ......
حسيت بقلبي بيدق جامد وعرقت في ثواني واتلخبطت وحسيت اني هتشل من الصد.مة .
انا عمري ما توقعت ان العلاقة بينهم تطور بالشكل ده ابدا !!!
رجعت لورا ونزلت بدون ما يحسوا بيا .
رجعت وخرجت من الشقة ونزلت علي السلم ووقفت قدام باب شقتي وكنت مترددة اطلع واواجهم و اخليهم يعرفوا اني شوفتهم ولا لأ .