حاجه ساقعه مش ساقعه

يا حاج غيرلي الحاجة الساقعة دي لو سمحت
عشان إيه اغيرهالك
عشان مش ساقعة
إنت مقتنع باللي انت بتقوله دا حاسس انك شخص عاقل
إيه الأوڤر دا يا عم مالك بقولك غيرلي الحاجة الساقعة
كمل الجملة بقى
عشان مش ساقعة
يا عيني عالمنطق لما تهرسه البهيم
بهيم مين يا عم انت ما تحترم سنك
متتحمقش أوي كدا مش انت لوحدك اللي به يم العالم بقى مليان بهيم
برضو بتغلط
عايزني اعملك إيه وانت جاي تقولي الحاجة الساقعة مش ساقعة
تغيرهالي
لأ أغيرلك مفاهيمك الأول انت قلت عليها حاجة ساقعة ودا اعتراف ضمني انها ساقعة
أنا قلت كدا عشان دا إسمها
لأ دا خطأ شائع هي اسمها سبيرو سباتس ساقعة بقى سخنة بالنعناع هتفضل سبيرو سباتس دا شيء مش هيتغير
لأ سبيرو دي ماركتها لكن المسمى حاجة ساقعة
هو دا الخلط اللي جايب البشرية كلها ورا شدلك كرسي واتر زع عشان افهمك
انا مش فاضي ورايا شغل
بقولك اتر زع مفيش شغل هتروح الشغل بغبوتك دي تعمل ايه
اللهم طولك يا روح وآدي قعدة
بص يا حبيبي فيه فرق بين الإسم والصفة الفرق دا لو داب الدنيا هتسيح
مش فاهم
يعني انت اسمك إيه
فارس
مدخلتش عليا بحصان يعني
عشان دا إسمي
حلو أوي يبقى مينفعش استخدم الإسم في التعبير عن الصفة
طب ما دا ينطبق على الحاجة الساقعة
لأ دي صفة مشروطة تنتفي بانتفاء الشرط هي أصلا اسمها مياه غازية
وبعدين
وبعدين بقى نشوف لو المياه الغازية دي ساقعة نقول عليها حاجة ساقعة لو مش ساقعة نقول عليها مش ساقعة دي الصفة
اول مرة آخد بالي من الحكاية دي حقيقي
متقلقش العالم كله غرقان في التناقضات عمرك جالك إنذار من المحكمة
لأ الحقيقة
لو جالك إنذار من المحكمة هتلاقي أول سطر فيه بيقول السيد فلان الفلاني
أيوه
يعني بيجرجروك من قفاك ويرموك في السچن ويقولوا عليك السيد شوفت الاحترام
آه والله
شركة المحمول لما بتبعتلك رسالة عشان تخطرك انها خصمت من رصيدك رسوم الخدمة اللي انت اصلا مشتركتش فيها دا اسمه إيه
س رقة طبعا
ومع ذلك بيقولولك في أول الرسالة عزيزنا العميل طب بالذمة حد يعمل في عزيزه كدا الدحيح يعمل كدا
لأ طبعا
الشركة اللي انت شغال فيها لما يرفدوك قول إن شاء الله
إن شاء الله
هيكتبولك إيه في آخر جواب الرفد
وتفضلوا بقبول فائق الاحترام
دا بعد ما س رقوا زهرة شبابك ورموك في الشارع
اه والله يا حاج
امتحان الثانوية العااااامة اللي بيجيب للعيال انهي ار عصبي
أيوه
مكتوب في آخره مع أطيب التمنيات بالنجاح والتوفيق
حصل وانا توفيق
طب