صاحب الكافيه

صاحب الكافيه
بقلم عادل عبد الله
قصة حقيقية
السلام عليكم انا تعبانة قوي
اسفة لكن انا نفسي اتكلم مع حد وينصحني ويقولي اتصرف ازاي
هقولكم حكاية وياريت قبل ما ت جلدوني يكون في قلوبكم رحمة
انا متزوجة من ٩ سنوات والحياة هادئة ومستقرة من حوالي ٣ سنوات نقلنا سكنا وروحنا سكنا في مكان جديد
المكان الجديد ده كان مفيش لنا اصحاب او اقارب خالص ومكنتش اعرف فيه اي حد لكن جوزي كان يعرف صاحب الكافية اللي جنب العمارة كان صاحبه من زمان
صاحب الكافية ده عمل كل المحاولات معايا علشان يكلمني لحد ما وصل لاكونت الفيس عن طريق الفيس بتاع جوزي !!
بعد حوالي سنة من كل المحاولات دي كلمته و كانت دي غلطتي !!
لحد ما اتعلقت به و اصبحنا بنتكلم تقريبا كل يوم كلام عادي
ووراني صورة لمراتو وولاده والصراحة مراته حلوة اوي و سألته مراتك جميلة وبيضة وعنيها ملونة بتبص لغيرها ليه يقولي متعرفيش حاجة اسمها ارتياح نفسي وانا ارتحت ليكي
وكنت احيانا بجيب حاجات يطلبها مني لمراته اقول يمكن ميعرفش يشتريها
فضلت علاقتنا حوالي سنة ونص مجرد كلام علي النت و مقابلات سريعة في الشارع لدقايق او لحظات بسيطة باخد منه حاجة او اديله حاجة بسرعة انما اغلب كلامنا كان علي النت
انا مكنش في نيتي حاجة خالص من ناحيتة مجرد صداقة مش اكتر
بس لقيت اهتمام جامد منه هو ده اللي أثر عليا وخلاني الټفت له
وفجأة لقيت طريق الكلام راح لاتجاة تاني خاااالص
نسيت اقولكم اني مع جوزي اقسم بالله متغيرت ولا حبي له قل
وكنت بزعل من نفسي اني بكلم الشخص ده
انا من فترة بكلمة بس الكلام بنا بقي مفتوح قوي قوي اي تفاصيل وادق التفاصيل له مع مراته بيحكهالي
ومع الوقت كلامه بقي جرئ قوي معايا وكل ما احاول اهرب من كلامه ده بلاقيه بيزيد فيها
ومعرفش ازاي وصلت لدرجة اني بقيت بتكلم معاه الكلام ده عادي
واخدنا علي بعض في الكلام وبقي يسألني علشان احكيله علي تفاصيل علاقتي الخاصة مع زوجي
وفي مرة قالي وش كده انا بحبك ومرتاحلك وعارف انه غلط بس انا ڠصب عني !!
طلبت منه اننا نبعد عن بعض لكنه متمسك بيا قوي وبيقولي اني اهم حاجة في حياته
انا حاليا ببعد بعد ما عرفت حاجات كتير عن ان علاقات النت دي غلط وحرام واقول انا كنت معمية انا ايه خلاني افتح الباب ده اصلا
ودلوقتي ندمانة ندم شديد وضميري بيوجعني !!
انا عملتله حظر ومسحت اي حاجة ممكن يعرف يوصل ويكلمني بيها
بتمني من ربنا كل دقيقة يسامحني ومش عارفة انا عاوزة اعيط مش عارفة حاسة ان في جبل ذنوب علي قلبي !!
ندمانه ومش لاقية حد اتكلم معاه اشيل الهم دا من علي قلبي انا بصلي واستغفر كتير هل ربنا حيستجيب مني عاوزة حد يقولي انا تعبانة نفسيا جدا من الخطأ دا الي عملته واسفة علي الاطاله
انتهت